In Remunj leek de vastelaovend in de lèste helft van de 19de en begin 20ste eeuw in ’n depe sjlaop te zeen. Aevel in sossjeteite en vereniginge en in los verbandj in kefees en op sjtraot, waerde in de 19de eeuw ouch in Remunj aan vastelaovend gedaon.
Vastelaovend op ein of anger wies in ‘georganiseerd’ verbandj. Veural door de Bourgeoisie, de liberale burgerij. Aevel ouch door ’t geweune volk waerde ‘volks’ getampees. Det ouch 't ‘geweune volk’ vastenavond vierde en döks euver de sjreef ginge is in gezette, beuk en kronieke vasgelag . Oetsjpattinge die volgens de Kattelieke Kirk, zeker in de Bussjopsjtad aan de voot van Kathedraal van Sint Christoffel , ‘zondigend, georganiseerd door verleidende gezelschappen en buitenissige vastelaovesvieringen, Sodom en Gomorra en poel des verderfs' genump waerde. Det boetsde sjteeds meer mit de Kirk en de Bussjop Paredis en zien opvolgers.
De vastelaovend waas ‘Duivels en een verleidingen van de Antichrist’. Wiejwaal d'r dus op 't inj van de 19de en begin 20ste eeuw in Remunj inkele ‘vastelaovesvereniginge’ ware óntsjtaon, Flarusse (1884-1914) en Schmookers (1898-1936) waerde in bussjopsjtad mer veurzichting en döks achter gerdiene en deure ‘get vastelaovend gevierd'. Alles dus ónger de ‘wakende’ kóntrol van de Roomsch Kattelieke Kirk die es herders good op häör sjäöpkes mosde lètte. In ’t interbellum begós de Kirk te begriepe det verbéje en veroordeile neet meer de juuste waeg waas óm de moraal te bewake. Alles ónger 't motto ‘if you can’t join them, beat them'.
In 't veurjaor van 1936 pakde VVV Roermonds Belang 't initiatief vastelaovesviering euver te naeme en van baove aaf te gaon organisere. Donderdaag 22 oktober 1936 kwame bienao alle Remunjse vereniginge in kefee Union biejein mit es doel de Carnaval te gaon organisere en in fatsoendelikke en nette bane te leije. Aevel d'r mosde ouch 'nnne naam bedach waere. Sjtraotverke en Nachuul waerde geopperd. Name die me in het Schwetskammezaol al jaore gebroekde. In de vergaderkamer van Kefee Union sjting oppe sjouw 'nne Uul dus waerde gekaoze veur (D'n) Uul. Statutair waerde dees oprichting vasgelach op 11-11-1936 en daomit is D'n Uul gebaore. Daomit waas 't fundament veur D’n Uul gelag. Mit de eerste Prins Thei I van Geldrop, eine sjlager ‘D’n Uul dae reup oehoe en eine optoch. D'n Uul en de Remunjse vastelaovend waas gebaore, ‘t fundament gelag wo-op D'n Uul kós boewe. Helaas waas 1939, veurluipig, 't léste vastelaovesjaor. Mit Prins Rein I Pijls in 1946 ‘Veer laive nog waim duit os get' waerde beweze det nao vief jaor oorlog de vastelaovend neet kepot te krieg waas.
