Dan blieftj de Orde vanne Gulden Humor effe inne kloes, want dan reike vae – de Samewirkende Limburgse Vastelaovesvereîniginge – de allerhoeëgste ongerscheiding uit di-j vae hebbe: de Gouden Narrenkap. De Gouden Narrenkap wurtj uutgereiktj aan ‘ne persoeën of ‘ne groep van persoeëne dae zich als vastelaovesartiest(e) in ‘ne langere tiêd bezûndjer verdeenstelik hieët gemaaktj vör de Limburgse vastelaovendj. Mer eîne kieër per drej jaor!

En allein vör emes dae neet éîn, neet tieën, mer ‘n hieël laeve lânk de zeel van oeëze vastelaovendj hieët uutgedrage, beschermdj en eders kieër weer e stökske schoeëner hieët gemaaktj.
Vanmiddig és zoeë ‘ne middig. En vanaovendj stieët heej eîne mân vör weem hieël Limburg al 3 x 11 jaor ‘tzelfdje ruptj: ‘‘t És pas fieëst as Big Benny és gewaesj!’

Ben Peters
Geboeëre op 18 december 1964 as jongste telg van e mienwêrkersgezin mét teen wichter. Vader uut Remundj, moôder uut Wieërt, zelf opgegruudj inne allerschoeënste wiêk van Remundj: ’t Vêldj.
Op z’n vieërtieëndje as de kleînste vanne gebroeders Peters di-j as bândparodiste, ‘n haost vergaete komisch genre woeëbeej artieste op secuur aaneîn gemontieërdje geluidsfragmênte playbacke en vörzeen van komische mimiek en lichaamsbewieëginge, vör hoongerd göldje (vör zes mân, pils 1 göldje, toch 100 pils) doeër Limburg trokke um de minse aan ‘t lache te make. Dao, tösse di-j komische capriole, krieëg hae ‘t vastelaovendjvirus vörgood te pakke. En e paar jaor – en volges broor Drè ‘n slordige 165 (of toch 115) kilokes – later schrieëf emes e liedje speciaal vör hem: “Sjat van mich”. Eîn liedje woeërt al gaw ‘n hieël serie en de liedjesschriêvers zoge ‘t innegang: mét dae jong és wat hieël bezûndjers aanne hând.

E piepklein zaelke, ve schriêve 1992 in Remundj. ‘n Hendjevôl minse. “Big Benny? Weem és det noow weer?” Onbekindj maaktj onbemindj, zagte ze toen. En noow; perbieërtj vandaag d’n daâg nog eîne Limburger te vînge dae nog noeëts van hem gehuuërdj hieët: det löktj uch neet. Zien prînsschap in 1995 beej de 'Vêldjmuus' mét tegeliêkertiêd Ton Nizet as stadsprîns beej d'n Uul, mer ouch artiest beej 'De léste aom' woeërt e bezûndjer jaor. Hae ontdékdje zien kunne as entertainer. Big Benny ontdékdje waat hae in hoês haaj: neet allein ‘n stum as e kanon, mer ‘t talênt um ‘nen hieële zaal, ‘n hieël stad en hieël Limburg op z’ne kop te zétte. En vanaaf det momênt waas d’r geîn haoje mieër aan. Van hoês-aan-hoês cd’s verkoupe op zoondigmêrge in ’t Vêldj mét zien ieërste album ‘Limburgs Yes!’ nao ‘n uutverkochtj Ahoy in Rotterdam in 2014.

Big Benny hieët 137 titels / songteksten op zeene naam staon:
Top 10 populaerste Big Benny-nummers (op basis van bekindjheid en streams)

  1. Riet aop dae tap (1998) – ‘nen Echte vastelaovendjkraker.
  2. Limbo Party (1999) – Nog altiêd ’n fieësthit in Limburg.
  3. Eine maeter beer (2010) – Bepaolendj vör de vastelaovendj.
  4. ’t Geit os good (2012) – Populaer beej fieëstveerders.
  5. Parapapapapa (2009) – Bekindj um ‘t mejzingrefrein.
  6. Limburg Merci (1994) – Zien ieërste groeëte succesnummer.
  7. Ich bön Kachel (2023) – Recênte hit, völ gestreamdj.
  8. Fundering nao de tering (2021) – Moderne fieëstknaller.
  9. Vrundj is veur aeve (2017) – Populaer beej vreendeclubs.
  10. Sjaele Wiekser (2023) – Actueel en geleefdj op streamingplatforms.

Rob Knubben van Marlstone Music : ‘t Nummer “Ich bön ein bees” leidje tot bekindjheid van Eijsde tot aan Mook.  Mét name in Maastreecht blieëf ‘t achter waat betreftj bookinge en bekindjheid, mer doeër dit nummer ging ouch Maastreecht “los”.

Zétj ein van di-j nummers op en ge zeetj ‘t innegang: ‘ne polonaise van e paar hoongerd maeter, erm om deindânger haer, van 8 tot 88 jaor aod. En waat hae vörâl deut – en dat maaktj hem zoeë uniek – hae verbingtj. Hae zingtj neet vör ‘t publiek, hae zingtj mét os. Hae kiektj uch aan, hae tréktj uch de tênt in, de polonaise in, ‘t laeven in. Hae és geîne artiest dae boeëven os stieët. Hae és os!
‘nen Echte no-nonsense jong uut ’t Vêldj dae nog altiêd in ‘t vereînigingslaeve actief és, dae as raodslid in Remundj gewoeën tösse de minse stieët, en dae beej ‘t vraoge vör ‘t laureaat vanne Gouden Narrenkap zieët: “Bah, vör mich geîne champagne, neet te zoêpe, dootj mich mer e pilske.” Mieër as dertig jaor lang hieët hae ginneraties aaneîn geknuiptj mét zien krachtige stum, zien energieke optraejes, zien unieke interactie en ziene gulle lach.

Big Benny és ‘t geluid van oeëze vastelaovendj.
Big Benny és ‘t geveul van thoêskaome in fibbrewarie.
Big Benny és e laevendj monumênt.

Daorum, leef minse, és d’r gein discussie muuëgelik. De Gouden Narrenkap – de allerhoeëgste ieër di-j vae kunne gaeve – huuërtj op mer eîne kop thoês.
Big Benny,
Benny, Ben,
jong uut ’t Veldj,
jongste van nuuëge,
Vêldjmuusprîns van 1995.
‘ne Remundjse reus mét e gouwe hert……komtj nao vuuëre.

In naam van alle 17 stadsvastelaovesvereîniginge, van Noord- tot Zuid Limburg, van edere vastelaovendjveerder dae oeëts mét uch mejgezongen hieët: Vae zeen apetrots op uch. Vae zeen uch oneindig dânkbaar. De 17 groeëtste en aodste stadsvastelaovesvereîniginge vînge ‘t ‘n groeëte ieër det vae uch vanaovendj vör eur gehieële vastelaovendjsouvre de Gouden Narrenkap 2025 moge uutreike. Noow dan, vanaovendj make vae ‘t groeëtste fieëst van Remundj oeëts, vör de hoeëgste ongerscheiding oeëts.
Nog hoeëger as de 40 maeter hoge kathedraal van ’t Vêldj 

Vorste, prînse, dames, hieëre... ‘n Staondje ovatie vör Big Benny.

Big Benny, Gaaaas.
Big Benny, Gaaaaas.
Big Benny, Gaaaaaas.

Bart Maes
Prizzident SLV

(met dank aan Jan Moonen | Veldeke Wieërt vor ut dialect).