Vier wiste dat d’r Tenny ‘t zjwoar houw. Zie sikkertaris-sjap houw heë al ieëder durch zieng krenkde d’r aa mótte geëve. Mè d’r Tenny voch zich trük en woa werm, wie ummer, doa vuur zieng SLV. Vurrig joar goof heë evvel aa, dat ‘t tied woa um inge ópvolger te zeuke. Vaweëge zieng groeëte verdeenste vuur de SLV hant de SLV-vereine destieds besjloate d’r Tenny te beneume tot iere-bestjuurslid va ós SLV. D’r Tenny goof óp zieng ege meneer ivulling aa ’t sikkertarissjap va de SLV. Heë houw ‘t ummer bis óp d’r letste komma geregeld. Heë dach ummer vuuroet en döks woare óch dinger al geregeld vuurdat de anger besjtuurslede d'r aa gedach houwe. D’r Tenny woa óch gruëtsj óp zieng ege Pielhaas, zoeë wie de Pielhaas gruëtsj woare óp d’r Tenny. Óp hönne vuurdrach is d’r Tenny zieëliger da óch in ‘t besjtuur gekoame.
Same mit d’r Peter Hilkens en Raymond Vlecken hant vier vuur ing nui besjtuursperiode en ing frisje aapak gesjtange, later aagevuld mit d'r Frits Dirks en d’r Paul Leenen. Vier hant same gevochte um de SLV nui elan te geëve, wat mit durch d'r Tenny ummer óp ing vuurbildlige wies woeëd ópgepak. ‘t Sjriefwirk koet me ruiïg aa d'r Tenny zieëliger uëverloate. Mè óch de lidvereine wiste hönne weëg noa d'r sikkertaris te vinge. Aavroage vuur de Orde va Verdeenste woeëde bis óp d’r letter genau durch d’r Tenny ópgepak. Óch ’t versjikke va oetnuëdiginge en ‘t verzurge va al wat mit de oetreiking va de Gulden Humor of de Gouden Narrenkap te make houw, woeëd durch d’r Tenny bis in de puntjes geregeld.
Vier zint d’r Tenny hieël vöal dank versjuldigd vuur de wies woeë-óp heë in ‘t digitale tijdperk al vuur de touwkoms hat veëdig gezat.
En noe is ózze Tenny neet mieë. Zie befaamde woad "ollie" bliet in ’t Rooijse dialek zieëker besjtoa, mè zal ummer verbónge blieve mit dizze bezóngere miensj.
Tenny, jóng, dank vuur al ..........!
Vier wunsje ‘t Liesbeth en de kinger hieël vöal sjterkde touw in dizze zjwoare tied.
